Sa është metri katror i banesave në Shqipëri

Janë marrë në konsideratë vetëm treguesit e vlerës dhe sipërfaqes në metra katrorë për ndërtimet për banim

Në vitet e fundit, tregu i pasurive të paluajtshme në Shqipëri ka përjetuar ndryshime të rëndësishme, duke reflektuar zhvillimet ekonomike dhe urbanistike të vendit. Çmimi mesatar i shitjeve në treg varion ndjeshëm sipas zonave, por “Scan Intel” ka zgjedhur të vijë me një llogaritje ndryshe, pra bazuar mbi një mesatare të thjeshtë nisur nga shifrat zyrtare mbi lejet e ndërtimit.

Janë marrë në konsideratë vetëm treguesit e vlerës dhe sipërfaqes në metra katrorë për ndërtimet për banim, shkruan Scan, transmeton albinfo.ch.

Sipas të dhënave zyrtare të analizuara nga “Scan Intel”, në vitin 2024, vlera e përafërt e lejeve të ndërtimit miratuar për banim vlerësohet në rreth 72 miliardë lekë, ose 727 milionë euro. Ndërkohë, po të njëjtat të dhëna tregojnë se sipërfaqja e lejeve për ndërtesat për banim për vitin 2024 regjistrohet në afërsisht 2 milionë katrorë. Kështu, nga këto dy tregues mund të themi se një metër katror në Shqipëri kushton rreth 36,257 mijë lekë ose rreth 360 euro.

Referuar të dhënave për pesë vitet e fundit shohim se kjo vlerë ka arritur një nivel më të lartë në 2023-shin dhe në vitin 2024. Në vitin 2020, një metër katror kushtonte rreth 35 mijë lekë.

Por si paraqitet kjo panoramë sipas qarqeve?

Nëse analizojmë të dhënat e INSTAT për vitin 2024 sipas qarqeve, ku përfshihen të gjitha llojet e ndërtimeve, del se qarqet që kanë patur kostot më të larta për metër katror janë Gjirokastra, Dibra, Lezha dhe Elbasani.

Theksojmë edhe njëherë se këto shifra nuk i referohen vlerave që kanë pasuritë e paluajtshme në treg, por janë shifra që i referohen një mesatareje nisur nga sipërfaqja dhe vlera e miratuar sipas shifrave zyrtare.

---