Sa viza u lëshuan gjatë vitit 2023 për në Zvicër?

Shumë të rinj dhe familjarë gjatë vitit 2023 kanë marrë rrugën për ndonjë shtet tjetër.

Vetëm brenda 10 muajve të vitit 2023, Ambasada e Zvicrës në Kosovë ka lëshuar 27,000 viza Shengen, shkruan albinfo.ch.

Vlen të theksohet se Ambasada e Zvicrës në Prishtinë lëshon viza jo vetëm për Zvicrën, por edhe për Francën, Austrinë, vendet e Beneluksit dhe Lihtenshtajnin. Nga janari deri në tetor janë lëshuar më shumë se 27,000 viza Shengen, 70% e të cilave ishin për Zvicrën. 68% e këtyre vizave Shengen janë dhënë për vizita familjare, 10% për biznes dhe 5% për turizëm.

“Në krahasim, ne kemi lëshuar 31.500 viza Shengen për të njëjtën periudhë në vitin 2022. Prandaj tashmë po ndjejmë disa nga efektet e liberalizimit të ardhshëm të vizave, i cili do të hyjë në fuqi në vitin 2024”, tregon Jürg Sprecher, për albinfo.ch.

Përveç kësaj, Ambasada tashmë ka lëshuar deri më tani rreth 1800 viza kombëtare zvicerane. Këto viza afatgjata janë lëshuar kryesisht për bashkim familjar (89%), për të studiuar (5%) dhe për punë (4%). Kjo lloj vize nuk do të ndikohet nga liberalizimi i vizave Shengen. /Albinfo.ch