Samiti i Diasporës, themelet për çerekshekullin e ardhshëm

Kryeministri i Shqipërisë, Edi Rama, fjalimin në Samitin e dytë të Diasporës që po mbahet në Tiranë e nisi me krahasimin dhe zhvillimet e jashtëzakonshme që kanë ndodhur në harkun kohor mes samitit të parë dhe këtij të tanishmit. Rama ftoi shqiptarët në Tuz të Malit të Zi të bashkohen dhe të lënë mënjanë armiqësitë. 

Ndërsa përmendi më pas sfidën historike përballë së cilës është Kosova. Ai deklaroi se shqiptarët përmes Kosovës janë përballë një sfide historike që përcakton se si do të jetojnë pas 30 vjetësh ata që ende nuk kanë lindur, përcjell albinfo.ch.

Historia e Kosovës është historia e bashkimit e mbi gjysmë miliardi euro që njerëzit jashtë Kosovës diaspora shqiptare të pasur e jo të pasur, kontribuuan për të çliruar Kosovën. 

“Bashkimi solli Kosovën që e kemi sot. Por Kosova që kemi sot nuk është ende Kosova që duam. Që duhet të njihet nga të gjithë, nuk është ajo që duhet të ulet njësoj si të gjithë në OKB, që duhet të futet si të gjithë në NATO dhe në BE dhe kjo është një sfidë për të cilën të gjithë duhet të japin kontributin e  tyre”, theksoi Rama. 

Në këtë samit pritet të diskutohen çështje të rëndësishme, si vota si e drejtë e emigrantëve, zhvillimi ekonomik i qëndrueshëm i vendit tonë, Shqipërisë; identiteti shqiptar, por edhe ftesat nga “shtëpia jonë” për të huajt që duan të vizitojnë vendin tonë me mrekullitë e saj natyrore dhe humane që ofron.