Sanksionet e Rusisë: “Zvicra është pjesë e problemit”

Ilustrim, Pixabay

Aktivisti dhe financieri britanik Bill Browder i ka bërë thirrje Zvicrës që të aplikojë sanksione kundër Rusisë dhe të përafrohet me politikën e Bashkimit Evropian, shkruan swissinfo.ch, përcjell albinfo.ch.

Browder gjithashtu kundërshtoi idenë e kthimit të fondeve të konfiskuara për rusët e sanksionuar të përfshirë në çështjen “Magnitsky”. Qëllimi i tij është të izolojë Rusinë financiarisht nga pjesa tjetër e botës dhe “Zvicra është pjesë e problemit”, tha ai në një intervistë për grupin zviceran CH-media.

Në muajin shkurt Browder akuzoi sistemin e drejtësisë zvicerane se ishte “i paaftë për t’u marrë me pastrimin e parave”. Komenti i tij erdhi pas vendimit të Zvicrës për t’u kthyer 14 milionë CHF tre individëve rusë të sanksionuar në Shtetet e Bashkuara të Amerikës dhe vende të tjera perëndimore.

Vladlen Stepanov, Denis Katsyv dhe Dmitry Klyuev janë protagonistët e aferës “Magnitsky”, e cila tërhoqi shumë kritika ndaj Zvicrës. Nëse zviceranët vendosin t’i kthejnë ato para, “vendi do ta gjente veten në qendër të një krize ndërkombëtare”, paralajmëroi Browder.

Megjithatë, ministria e jashtme zvicerane ka hedhur poshtë akuzat e komisionit amerikan për korrupsion, duke thënë se “pretendimet se Zvicra po bën më pak se vendet e tjera dhe se ajo ende po strehon fonde nga individë të sanksionuar pa i ngrirë ato janë të pabaza”.