Seanca konstituive e Kuvendit të Kosovës mbahet të mërkurën

Kjo seancë vjen pasi më 18 gusht filloi të rrjedhë afati 30-ditor për formimin e organit ligjvënës, pas aktgjykimit të plotë të Gjykatës Kushtetuese

Më 20 gusht, në orën 11:00, deputetët e rinj të Kuvendit të Kosovës do të zhvillojnë seancën konstituive të legjislaturës së dalë nga zgjedhjet e mbajtura në shkurt.

Kjo seancë vjen pasi më 18 gusht filloi të rrjedhë afati 30-ditor për formimin e organit ligjvënës, pas aktgjykimit të plotë të Gjykatës Kushtetuese. Në vendimin e saj, Kushtetuesja kërkon që brenda këtij afati të zgjidhet kryetari i Kuvendit me votim të hapur, duke lejuar që i njëjti kandidat të hidhet në votim jo më shumë se tre herë.

Presidenca e Kosovës e ka cilësuar konstituimin e Kuvendit si “urgjencë shtetërore”, duke theksuar se krijimi i shpejtë i institucioneve është vendimtar për stabilitetin dhe përfaqësimin demokratik. Në reagimin e saj thuhet se zvarritja e procesit ka dëmtuar besueshmërinë e institucioneve, zhvillimin e brendshëm të vendit si edhe përparimin në arenën ndërkombëtare.

“Deputetët duhet të tregojnë përgjegjësi të plotë dhe të veprojnë në frymën e bashkëpunimit, në mënyrë që Kosova të ecë e konsoliduar përpara dhe të përballet me sukses me sfidat e ardhshme”, thuhet në njoftimin e Presidencës.

Vendimi i Gjykatës është mirëpritur nga partitë opozitare të legjislaturës së kaluar, ndërsa është kritikuar nga fituesja e zgjedhjeve, Lëvizja Vetëvendosje.

Sipas profesor Zahir Çerkinit, ligjërues i së Drejtës Kushtetuese në Universitetin “Isa Boletini” në Mitrovicë, respektimi i aktgjykimit nuk është çështje opsionale, por obligim i domosdoshëm. “Çdo vonesë tjetër jo vetëm që shkel Kushtetutën, por rrezikon të prodhojë krizë të thellë institucionale dhe të minojë themelet e shtetit ligjor”, u shpreh ai për Radion Evropa e Lirë më 18 gusht.

lexoni po ashtu:

Kosovë: Gjykata Kushtetuese publikon aktgjykimin e plotë për Kuvendin

Vetëvendosje deklarohet për Aktgjykimin e Gjykatës Kushtetuese: Arbitrar dhe cenon demokracinë

---