Sentiqi, diplomati i parë serb i Kosovës

Zëvendësambasador i Kosovës në Britaninë e Madhe do të jetë këshilltari i lartë politik për çështje të komuniteteve i kryeministrit Hashim Thaçi, Sërgjan Sentiq, raportuar sot mediat kosovare.

Pritet që gjatë këtij muaji ai të emërohet edhe zyrtarisht zëvendësambasador në Londër.

Ndërsa, zyrtarë të lartë të Ministrisë së Punëve të Jashtme (MPJ) nuk e kanë përjashtuar mundësinë e emërimit edhe të diplomatëve të tjerë nga radhët e komuniteteve pakicë, por nuk kanë veçuar ndonjë emër konkret.

“Sentiq pritet të dërgohet në Londër. Ai mund të jetë i pari diplomatë serb por jo edhe i vetmi nga radhët e komuniteteve pakicë”, ka thënë një nga zyrtarët e lartë i MPJ-së.

Aktualisht Ambasada e Kosovës në Londër drejtohet nga Muhamet Hamiti, i cili i takon grupit të ambasadorëve të parë që pas pavarësisë janë emëruar në dhjetë shtete të botës.

Ndryshe, Sentiq është i lindur në Gjilan dhe është jurist i diplomuar. Përpara se të angazhohet si këshilltar i kryeministrit Thaçi, ai ka qenë këshilltar i lart i përfaqësuesit special të sekretarit të përgjithshëm të OKB-së për Kosovë. Puna e tij është fokusuar kryesisht në ofrimin e këshillave strategjike për të drejtat e minoriteteve dhe për kthimin e personave të zhvendosur.