Shaqiri, më i miri në Zvicër

Mediumi i njohur zviceran e lartëson yllin shqiptar

Xherdan Shaqiri po shkëlqen që nga rikthimi i tij në Superligën e Zvicrës.

Ai është rikthyer në futbollistin më të rëndësishëm te skuadra e Baselit dhe po ashtu në futbollin zviceran.

Me pesë gola dhe tetë asistime në 14 ndeshje, Shaqiri është një kontribuues i jashtëzakonshëm te skuadra, gjë e cila ka ndikuar që mediumi i njohur, ‘20 Minuten.ch’, respektivisht dy gazetarët Fabian Ruch dhe Sven Forster, t’i japin epitetin e futbollistit më të mirë të gjysmës e parë të sezonit, transmeton albinfo.ch.

Shaqiri është rikthyer nga SHBA, përkatësisht nga Chicago, derisa ka pasur karrierë të ndritur në futbollin evropian, duke luajtur për Bayern Munich, Inter, Stoke City, Liverpool dhe Lyon.

Ai me Zvicrën është pensionuar, duke qenë njëri nga futbollistët më të rëndësishëm te Nati, në dekadën e fundit.

---