Shaqiri lejohet të ndërtojë vilën në Rheinfelden, me kushte

Lehtësim për yllin shqiptarozviceran të futbollit, Shaqirin: Vila e tij në Rheinfelden mund të ndërtohet me kushte

Ylli i futbollit Xherdan Shaqiri lejohet të ndërtojë një vilë të planifikuar në Rheinfelden, Aargau, në varësi të kushteve të caktuara. Një vendim përkatës nga Gjykata Administrative e Aargaut është bërë ligjërisht i detyrueshëm, transmeton albinfo.ch. Vendimi pasoi një beteje të gjatë ligjore mbi projektin e ndërtimit.

Ndërtesa e re, e cila do të përfshijë një apartament, garazh, pishinë të jashtme dhe hidromasazh, tani mund të ndërtohet, shkruan sda.ch. Megjithatë, duhet të instalohen perde në dritare, duke përfshirë edhe xhamat e shkallëve, siç deklaroi gjykata në vendimin e saj të 20 tetorit.

Roger Erdin, sekretar i qytetit të Rheinfeldenit, konfirmoi për agjencinë e lajmeve Keystone-SDA se vendimi anonim i Gjykatës Administrative ka të bëjë me projektin e ndërtimit të Shaqirit.

Beteja ligjore deri në Gjykatën Supreme Federale

Kundër ndërtimit, të cilin qyteti e kishte miratuar që në vitin 2022, ishin paraqitur kundërshtime. Në janar 2024, Gjykata Administrative e kishte revokuar lejen e ndërtimit sepse kishte zbuluar se zona e lejuar e zhvillimit të pronës ishte tejkaluar me 13 për qind.

Në mars të këtij viti, Gjykata Supreme Federale vendosi ndryshe për ankesën e Shaqirit kundër vendimit të gjykatës së shkallës së parë. Ajo vendosi që niveli i apartamentit në katin e parë nuk mund të përfshihej në llogaritjen e zonës së zhvillimit.

Kështu, çështja iu kthye Gjykatës Administrative të Aargaut për sqarim të çështjeve të mëtejshme.

---