SHBA i bën thirrje Kosovës: Bashkohuni me urgjencë në projektet e gazit amerikan

Zëvendës shefja e ambasadës së SHBA-së në Prishtinë, Anu Prattipati, i ka kërkuar zyrtarisht Kosovës që të bëhet pjesë e projekteve rajonale të gazit natyror të lëngshëm (GNL) amerikan. Përmes një opinioni mbi sigurinë energjetike, diplomatja tërhoqi vëmendjen se vendi po përballet me një varësi gjithnjë e më të madhe nga importi i rrymës.

​Sipas Prattipati, Kosova duhet të veprojë pa vonesë, pasi ndërtimi i infrastrukturës kërkon kohë dhe vonesat mund të bëjnë që furnizimet amerikane të orientohen drejt tregjeve të tjera. Ajo përmendi mundësitë e lidhjes me “Korridorin Vertikal të Gazit”, terminalin në Kroaci apo gazsjellësin Aleksandrupolis-Shkup.

​”Administrata e presidentit Trump prioritet kryesor e ka uljen e varësisë së Evropës nga energjia ruse. Ne e nxisim Kosovën të hyjë në partneritet afatgjatë energjetik me Amerikën”, ka thënë Prattipati, duke theksuar se kjo zgjedhje strategjike do të forcojë ekonominë dhe sigurinë e vendit.