SHBA mbështet Kosovën me 30 milionë dollarë

Presidenti i Kosovës, Hashim Thaçi dhe ambasadori i SHBA-ve, Greg Delawie kanë nënshkruar sot një marrëveshje për amandamentimin e Marrëveshjes mbi Grantin e Objektivave Zhvillimore, përcjell albinfo.ch.

Ky grant është 30 milionë dollarë për mbështetje në fushën e sundimit të ligjit, qeverisjes së mirë dhe investimet në sektorin privat.

Presidenti i Kosovës është shprehur se, marrëveshja e sotme është edhe një hap përpara e mbështetjes së SHBA-ve që i kanë dhënë Kosovës në konsolidimin e shtetit.

Thaçi deklaroi se ky është mesazhi më i mirë që buron në prag të 10 vjetorit të pavarësisë dhe mesazhit për investitorët.

Ndërsa ambasadori Greg Delawie tha se ky vit ka pasur të arritura të rëndësishme. Ai tha se Kosova ka kaluar në një proces zgjedhor e pastaj edhe kalimin te Qeveria e re, e po ashtu edhe nënshkrimi i kontratës për Termocentralin Kosova e Re.