SHBA-ja dhe NATO-ja reagojnë ndaj planit të Kosovës për themelimin e Xhandarmërisë

Ambasada amerikane kërkon që iniciativa të jetë në përputhje me ruajtjen e paqes dhe sigurisë, ndërsa NATO thotë se po e monitoron nga afër situatën

Shtetet e Bashkuara të Amerikës dhe NATO-ja kanë reaguar pas njoftimit të institucioneve të Kosovës për ndërmarrjen e hapave të parë drejt themelimit të Xhandarmërisë së Kosovës, përcjell albinfo.ch.

Një zëdhënës i Ambasadës amerikane në Prishtinë tha për Radion Evropa e Lirë se SHBA-ja pret që çdo plan i Qeverisë në detyrë për krijimin e kësaj force të jetë “në përputhje me zotimet e saj për ruajtjen e paqes dhe sigurisë”.

“Po monitorojmë njoftimet e fundit sa i përket propozimit për krijimin e një force xhandarmërie në Kosovë”, deklaroi ambasada amerikane.

Më 19 maj, ministri në detyrë i Punëve të Brendshme, Xhelal Sveçla, bëri të ditur se është nënshkruar dokumenti për krijimin e një grupi punues që do të analizojë dhe propozojë modalitetet e funksionimit të Xhandarmërisë së Kosovës.

Sipas Sveçlës, kjo strukturë do të kishte rol në ruajtjen e kufijve, integritetit territorial, luftimin e terrorizmit, menaxhimin e trazirave dhe mbrojtjen e infrastrukturës kritike.

Edhe NATO-ja ka konfirmuar se po i përcjell nga afër zhvillimet lidhur me këtë iniciativë. Një zyrtar i aleancës tha për Radion Evropa e Lirë se organizata vazhdon bashkëpunimin me institucionet e sigurisë në Kosovë dhe pret koordinim të vazhdueshëm me misionin paqeruajtës të KFOR-it.

“KFOR-i dhe NATO-ja vazhdojnë të kontribuojnë për siguri të qëndrueshme për të gjitha komunitetet në Kosovë”, thuhet në reagim.

Sipas NATO-s, Ekipi Këshillues dhe Ndërlidhës i NATO-s ka mbështetur zhvillimin e Forcës së Sigurisë së Kosovës përmes ngritjes së kapaciteteve, edukimit dhe trajnimeve, në përputhje me mandatin ekzistues.

Ndërkohë, nga Ambasada gjermane në Prishtinë kanë bërë të ditur se nuk do të komentojnë këtë çështje.

Nisma për krijimin e Xhandarmërisë është kritikuar nga autoritetet në Beograd, të cilat kanë deklaruar se KFOR-i mbetet “forca e vetme legjitime e armatosur në Kosovë” për kontrollin dhe patrullimin përgjatë vijës administrative.

Eksperti i sigurisë, Mentor Vrajolli, ka vlerësuar se një forcë e tillë mund të marrë kompetenca në ruajtjen e kufirit me Serbinë, rol që aktualisht mbulohet nga KFOR-i. Ai shtoi se Kosova duhet të përgatitet gradualisht për zhvillimin e kapaciteteve vendore të sigurisë, veçanërisht për veriun e vendit.

Sipas tij, Xhandarmëria mund të krijonte një strukturë të re sigurie jashtë marrëveshjes ekzistuese mes KFOR-it dhe FSK-së për mosprani të rregullt të FSK-së në veri pa miratimin e NATO-s./rel

---