Shefi i Apple thotë se rrjetet sociale po i ndajnë njerëzit

Shefi ekzekutiv i Apple, Tim Cook, nuk ka vlerësim të lartë për kompanitë pronare të rrjeteve sociale dhe kompanitë reklamuese, pas skandalit në të cilin kompanitë ruse ndërhynë në zgjedhjet presidenciale në SHBA më 2016.

Në një intervistë për “NBC”, Cook ka thënë se problemi nuk është vetëm te grupet e caktuara, por te të gjitha rrjetet sociale që po shërbejnë si “lojë” për mosinformim dhe manipulim, transmeton Albinfo.ch.

“Nuk e besoj se problemi kryesor janë reklamat nga qeveritë e huaja. Besoj se kjo është vetëm një për qind e çështjes”, ka thënë Cook. “Problemi më i madh është se disa veçori po shfrytëzohen për të ndarë njerëzit, për të manipuluar, për të marrë lajme false dhe për të ndikuar në mendimet e tyre. Kjo për mua është pika e parë”.

Kongresi amerikan ka kërkuar nga kompanitë e mëdha si Google, Facebook dhe Twitter të ndryshojnë mundësitë e abuzimeve dhe ndërhyrjeve politike në rrjete sociale.