Shifra shqetësuese: Për një muaj, 127 kosovarë diagnostikohen me kancer

Në Klinikën e Onkologjisë Mjekësore të Qendrës Klinike Universitare të Kosovës, në nëntëmujorin e vitit 2017, ka pasur 1 mijë e 128 raste të trajtuara nga kanceri, thotë drejtori i Klinikës Onkologjike në Qendrën Klinike Universitare të Kosovës, Ekrem Hyseni

Një 53-vjeçare nga Gjilani e cila është diagnostikuar me sëmundjen e kancerit para pak mujash, duke u ndjerë e shqetësuar për këtë sëmundje, por në anën tjetër i shtohet edhe kurajoja për ta mundur “të keqen”. Ajo priste rendin për t’iu nënshtruar kontrolleve në Klinikën e Onkologjisë që gjendet në Qendrën Klinike Universitare të Kosovës. Në këtë institucion thonë se brenda muajit 127 kosovarë janë me këtë sëmundje të rëndë.

Nga analizat që kishte bërë në Qendrën Klinike Universitare të Kosovës, kishte dalë se kishte kancer në mitër. Thotë se po i ndjek me përpikëri të gjitha rrezatimet të cilat, sipas saj, çojnë në fundin e kësaj sëmundjeje. Fat të njëjtë si të 53-vjeçares kanë edhe qindra kosovarë të tjerë. Madje numri i tyre po del të jetë shqetësues. Veç për muajin shtator, 127 kosovarë janë diagnostikuar me kancer.

Ndërsa, për nëntë muaj të këtij viti kanë qenë rreth 1 mijë e 128 raste të reja të kosovarëve që vuajnë nga sëmundja e kancerit, shifër kjo më e lartë për 363 raste të reja të pacientëve krahasuar me nëntëmujorin e vitit paraprak.

Drejtori i Klinikës Onkologjike në Qendrën Klinike Universitare të Kosovës, Ekrem Hyseni, ka thënë të martën për “gazetën express” se e kjo Klinikë ka pasur furnizim stabil me barna për mjekim me kimioterapi dhe radioterapi pacientëve në nevojë.

“…në Klinikën e Onkologjisë Mjekësore të Qendrës Klinike Universitare të Kosovës, në nëntëmujorin e vitit 2017, ka pasur 1 mijë e 128 raste të trajtuara nga kanceri”, thekson ai.

Hyseni thotë se prijnë rastet e kancerit në gji, dhe ai i mushkërive dhe kanceri i zorrëve. Ai ka treguar se Klinika e Onkologjisë është duke ofruar shërbime të kimioterapisë venoze, intrapleurale dhe intratekale, radioterapisë, transfuzionit, mjekimit ditor suportiv dhe mjekimit paliativ ditor.

Cilat barna mungojnë në QKUK për trajtimin e kancerit?

Drejtori i Klinikës Onkologjike, Ekrem Hyseni, ka thënë se furnizimi me barna për pacientët të cilët vuajnë nga sëmundja e kancerit në përgjithësi është stabil. Por në këtë Klinikë, sipas tij, mungojnë dy produkte për sëmundjen e kancerit.

“Klinika e Onkologjisë e ka një furnizim relativisht stabil. Janë disa produkte që mungojnë. Janë dy-tre produkte me të cilat herë pas here kemi pasë furnizim të rregullt, por prapë ky është furnizim stabil. Produkti “Zoladec” mungon për momentin që përdoret te kanceri i gjirit dhe një produkt tjetër”, ka thënë Hyseni.

E ndërkohë në Klinikën e Onkologjisë edhe aparaturat e radioterapisë po kanë defekte duke bërë kështu që lista e pritjes së pacientëve për radioterapi gjatë tremujorit të dytë të këtij viti të jetë më e gjatë. Tutje, drejtori i Onkologjisë, Ekrem Hyseni, thotë se kosovarët duhet të jenë më të kujdesshëm në mënyrën e jetesës në mënyrë që ta anashkalojnë këtë sëmundje.

“Jeto shëndetshëm. Që nënkupton jetë pa duhan, alkool, me ushqim të kontrolluar dhe sa më pak yndyra”, është mesazhi i doktor Ekremit për kosovarët. Ndërkaq, rreth 210 kosovarë kryejnë terapinë e kimioterapisë për vetëm një ditë në klinikën e QKUK-së.