Shkalla e papunësisë në Evropë, më e ulëta në 9 vitet e fundit

Siç konstaton Organizata Botërore e Punës në kuadër të OKB-së, ILO në një raport të publikuar sot, kjo shkallë ka qenë 8.5 për qind. Një vit më parë ajo ka qenë 9.2%

Shkalla e papunësisë në Evropërn Perëndimore, veriore dhe juglindore, gjatë vitit 2017 ka qenë më e ulëta që nga viti 2008, gjegjësisht nga viti i krizës së madhe financiare.  Siç konstaton Organizata Botërore e Punës në kuadër të OKB-së, ILO në një raport të publikuar sot, kjo shkallë ka qenë 8.5 për qind. Një vit më parë ajo ka qenë 9.2%.

ILO llogarit se do të ketë një vazhdim të trendit pozitiv. Kështu, sipas saj, në fund të këtij viti, shkalla e papunësisë në Evropë do të jetë 8.1% ndërsa një vit më vonë, 7.7%.

Për të bërë këtë raport, organizata në fjalë ka krahasuar të dhënat e 30 shtetve, anëtare të BE-së dhe fqinje të tyre.

Shkalla më e lartë e papunësisë, me gjithë uljen e regjistruar vitin e kaluar, mbetet ajo në Greqi, 19.5% dhe në Spanjë, 15,4%.

Në raportin e saj, ILO ka përfshirë edhe shkallën e papunësisë në rrafshin botëror. Kjo shkallë në vitin 2017 ka qenë 5.6 për qind. Por, sipas konstatimit të organizatës, 1.5 miliard njerëz në gjithë botën punojnë në kushte të mjerueshme.

ILO, si organizatë e OKB-së ka për detyrë të promovojë barazinë sociale dhe të drejtat e njeriut dhe të punës, në gjithë botën.