Shkarkohen 12 punonjës të policisë në Elbasan

Shkarkime masive kanë ndodhur në Policinë e Elbasanit, e krejt kjo lidhur me ngjarjen e 18 shtatorit të këtij viti, ku një mjet “Audi” përplasi makinën e policisë gjatë një operacioni të policisë.

Drejtori i Përgjithshëm i Policisë së Shtetit, Haki Çako, ka nënshkruar shkarkimin e 12 drejtuesve të policisë nga drejtori i Policisë e deri tek shefat e sektorëve, përcjell albinfo.ch.

“Kam komanduar në krye të kësaj drejtorie një nga drejtuesit më të lartë të Policisë së Shtetit, Drejtorin e Departamentit të Sigurisë, Drejtues i Lartë, Altin Qato, i cili do të mbështetet nga një sërë specialistësh të Drejtorisë së Përgjithshme të Policisë së Shtetit, të caktuar në mbështetje të tij për drejtimin dhe menaxhimin e strukturave vendore, qoftë në planin e ristrukturimit të plotë, qoftë në planin e goditjes së elementeve kriminalë”, ka thënë Çako.

Në një konferencë urgjente për mediat, Çako tha se strukturat drejtuese dhe operuese në Drejtorinë Vendore të Policisë në Elbasan janë treguar të paafta për të menaxhuar situatën e krijuar më 18 shtatorit 2017.