Shkëlzen Gashi bëhet temë debati në mediet zvicerane

Me kualitetet që ka para portës, ai e ka të garantuar bundesligën gjermane”, thotë Turkilmaz

Epoka e Shkëlzen Gashit të skuadra e FC Basel-it duket se ka përfunduar. Golashënuesi më i mirë në dy vitet e fundit në ligën zvicerane po kalon një krizë të madhe me trajnerin e ri Urs Fischer, i cili jo vetëm që nuk e aktivizon, por as nuk e fton të jetë në listën e lojtarëve.

Sulmuesi i kombëtares shqiptare ndeshjen e fundjavës që Bazeli e zhvilloi kundër Young Boys e përcolli nga tribuna. Kjo sjellje e trajnerit me Gashin, ka ngjallur debat në mediet zvicerane.

Përveç tenistit zviceran me famë botërore Roger Federer i cili pasi kishte një takim me Gashin e konsideroi absurditet që ai të mos jetë të paktën në bankën rezervë.

Edhe më i ashpër ka qenë kolumnisti sportiv i gazetës “Blick.ch” ish fubollisti Kubilay Türkyilmaz i cili ka thënë se Gashi duhet sa më parë të largohet nga ekipi i Bazelit.

“Shkëlzen Gashi duhet të largohet nga Bazeli. Në të kundërt, ai rrezikon dy gjëra: së pari, për të shkatërruar çdo gjë, atë që e ka ndërtuar si një golashënues në dy vitet e fundit, dhe, së dyti, ka për të humbur vendin e tij në Kombëtaren e Shqipërisë për në kampionatin evropian”, shkruan ai në kolumnen e tij, përcjell “albinfo.ch”.

Në shkrimin e tij, Turkilmaz thekson se për shkak të ndërrimit të trajnerit edhe ai ishte detyruar të largohet nga Brescia dhe të shkojë në Lugano, por Gashi nuk e meriton të veprojë ashtu. “Me kualitetet që ka para portës, ai e ka të garantuar bundesligën gjermane”, thotë Turkilmaz.