Shkencëtarët paralajmërojnë: Rezervat e ujit të pijshëm në Evropë po shterojnë

pixabay

Një analizë e re, e bazuar në mbi 20 vite të dhënash satelitore, tregon se shumë zona të Evropës po humbin ujë të ëmbël me shpejtësi. Studiuesit nga University College London, në bashkëpunim me The Watershed Investigations dhe Guardian, kanë vëzhguar ndryshimet në fushën gravitacionale të Tokës për të matur sasinë e ujit të ruajtur në tokë, liqene, lumenj e akullnaja.

Sipas tyre, Evropa po ndahet në dy zona të qarta: veriu dhe veriperëndimi po bëhen më të lagëta, ndërsa jugu dhe qendra e kontinentit – përfshirë Spanjën, Italinë, Francën, Zvicrën, Gjermaninë dhe disa pjesë të Mbretërisë së Bashkuar – po përballen me tharje të shpejtë.

Shkencëtarët thonë se rezervat e fshehura të ujërave të ëmbla po zvogëlohen në mënyrë të rrezikshme dhe kërkojnë që politikanët të marrin seriozisht reduktimin e emetimeve.

Kjo situatë nuk është vetëm evropiane. Probleme të mëdha me thatësinë po shfaqen edhe në Lindjen e Mesme, Azi, Amerikën e Jugut, pjesë të SHBA-së dhe Kanadasë. Një shembull ekstrem është Teherani, ku autoritetet paralajmërojnë se qyteti mund të arrijë “ditën zero” – momentin kur uji i pijshëm do të mungojë plotësisht, duke detyruar edhe masa ekstreme si evakuimi.