Shkolla Shqipe në Bavari përfaqëson shqipen mes shumë shkollave në Mynih

Shqipja e përfaqësuar denjësisht mes shumë shkollave në Festivalin e Përrallave në Mynih

Shkolla Shqipe në Bavari ka marrë pjesë në Festivalin e Përrallave, të mbajtur në Qendrën Kulturore GOROD / MORGEN e. V. në Mynih, duke prezantuar me sukses gjuhën dhe kulturën shqiptare në një ngjarje multikulturore me pjesëmarrje të gjerë, shkruan albinfo.ch.

Në këtë festival, nxënësit e klasave të gjuhës shqipe nga Rosenheim, Kolbermoor dhe Aschaffenburg prezantuan përrallën e njohur “Kësulëkuqja” në gjuhën shqipe, përkrah shumë gjuhëve të tjera të botës. Performanca e tyre u prit me interes dhe vlerësim nga të pranishmit, duke dëshmuar rëndësinë e ruajtjes dhe promovimit të gjuhës amtare në diasporë.

Organizatorët falënderuan mësueset Valbona Roqi dhe Irma Koka për angazhimin dhe përkushtimin e treguar në përgatitjen e nxënësve, si dhe nxënësit dhe prindërit për mbështetjen e vazhdueshme në realizimin e këtij aktiviteti kulturor.

Ngjarja u nderua edhe me pjesëmarrjen e Konsulles së Përgjithshme të Shqipërisë në Bavari, znj. Gentiana Mburimi, e cila shprehu mbështetjen e saj për iniciativa të tilla që kontribuojnë në ruajtjen e identitetit kombëtar dhe forcimin e lidhjeve kulturore në diasporë.

Nga Shkolla Shqipe në Bavari u shpreh shpresa që aktivitete të tilla kulturore dhe edukative të vazhdojnë edhe në të ardhmen, duke krijuar hapësira të reja për promovimin e gjuhës dhe kulturës shqiptare.

---