Shpëtohen dy alpiniste pas disa orësh kërkimi në Bjeshkët e Sharrit

Sot, pas disa orë kërkimi, janë gjetur dy shtetase të huaja që kishin humbur në bjeshkët e Sharrit, përcjell albinfo.ch.

Policia ka njoftuar se dy gratë po qëndronin në një hotel në Brezovicë e mëngjesin e së mërkurës ishin nisur për ecje malore në bjeshkët e Sharrit, por se gjatë rrugës për shkak të kushteve të vështira dhe terrenit të panjohur kanë humbur rrugën.

“Rreth orës 20:50, Policia Rajonale e Ferizaj, respektivisht Stacioni Policor në Shtërpcë ka pranuar një informatë se dy alpinistet kishin humbur rrugën dhe ndodheshin diku në zonën malore të Sharrit, por pa ditur saktësisht vendndodhjen e tyre. Përmes një audio incizimi, ato kishin treguar gjendjen e tyre të rënduar dhe pamundësinë për të vazhduar më tej”, thuhet në njoftim.

Policia ka kërkuar ndihmën e Forcës së Sigurisë së Kosovës si dhe Shërbimit të Kërkim Shpëtimit Malor të Kosovës. E, pas disa orësh kërkimesh intensive dhe përpjekjeve të koordinuara, më 22 maj, rreth orës  03:00, dy shtetaset e huaj janë gjetur në bjeshkët e fshatit Gotovushë.

“Ato janë transportuar menjëherë me autoambulancë në Shtëpinë e Shëndetit në Shtërpcë. Sipas mjekëve, gjendja e tyre është stabile, përveç një lëndimi të lehtë në këmbë tek njëra prej tyre”, njoftoi tutje PK.