Shpëtohet një gjerman në bregdetin shqiptar

Gjendet disa orë pasi kishte humbur në ujërat detare shqiptare

Raportohet se një shtetas gjerman është shpëtuar nga Policia e Shqipërisë pasi kishte humbur në ujërat detare shqiptare për shkak të motit të keq, përcjell albinfo.ch.

Thuhet se mjeti lundrues i tij është lokalizuar në grykëderdhje të lumit Vjosë, i ngecur në cekëtinë, ka thënë policia.

Sipas informatave të policisë, kapitenit të anijes i është dhënë ndihma e parë, por gjendja e tij shëndetësore është e mirë.

“Pas marrjes së njoftimit nga Interpol Tirana, në kuadër të shkëmbimit të informacionit me zyrën homologe të Interpolit në Gjermani, se një shtetas gjerman, i cili ishte nisur me mjet lundrues veliere, nga Korfuzi në drejtim të Sllovenisë, kishte humbur kontaktet me familjarët e tij, gjatë drejtimit të mjetit lundrues në ujërat detare të Shqipërisë, menjëherë shërbimet e Policisë Kufitare kanë organizuar punën për kërkimin e mjetit lundrues dhe shpëtimin e shtetasit që e drejtonte atë”, thuhet në njoftim.

Kërkimi ka zgjatur disa orë, ndërsa tani policia po mundohet që ta tërheqë edhe mjetin lundures nga cekëtina për ta transportuar në portin e Vlorës.

---