Shqetëson shkelja e të drejtave të punëtorëve

Shkelësit më të mëdhenj të të drejtave të punëtorëve mbesin ndërmarrjet e mëdha.

Kosova mbetet vendi në të cilin punëtorët vazhdojnë të kryejnë punë jo të dinjitetshme. Kurse shkelësit më të mëdhenj të të drejtave të punëtorëve mbesin ndërmarrjet e mëdha.

Me rastin e Ditës Botërore për Punë të Dinjitetshme, Qendra për trajnime dhe studime gjinore organizoi tryezën me temën “Puna e dinjitetshme në institucionet publike versus puna e dinjitetshme në sektorin privat: Dallimet ,ngjashmëritë dhe sfidat”.

Kryetari i KMLDNJ-së, Behxhet Shala, ka thënë se ndërmarrjet e mëdha janë ato që shkelin më së shumti të drejtat e punëtorëve, duke bërë kontrata jo të mira.

Sipas tij, shkelje e të drejtave më së shumti u bëhet femrave dhe se për këtë institucionet ligjore ende nuk kanë ndërmarrë ndonjë masë.

Megjithëse, vërehet një shkelje e madhe e të drejtave të punëtorëve, Policia e Kosovës ende nuk ka arritur të japë ndonjë statistikë.

Tahire Haxholli, udhëheqëse e Njësisë kundër dhunës në familje dhe keqtrajtimit të fëmijëve në Policinë e Kosovës, ka theksuar se më së shumti ka pasur ankesa nga femrat të cilat janë ngacmuar seksualisht nga punëdhënësit.

Kryetari i BSPK-së, Haxhi Arifi, kërkon që të bëhet trysni më e madhe tek institucionet, në mënyrë që problemi i shkeljes së të drejtave të punëtorëve dhe punës së dinjitetshme të jetë prioritet për qeverinë.

Të pranishmit në këtë tryezë bën thirrje, po ashtu, për mobilizimin e sindikatave në mënyrë që dukuria e shkeljes së të drejtave të punëtorëve dhe mos ofrimit të një pune të dinjitetshme të jetë sa më e minimizuar.