Shqipëri-Kosovë, debutim special për Alban Pnishin

Në ndeshjen miqësore ndërmjet Kosovës dhe Shqipërisë do të debutojë Alban Pnishi.

Mbrojtësi i Grasshoppersit ishte ftuar dy herë nga përzgjedhësi Albert Bunjaku, por për shkak të lëndimit nuk kishte mundur të debutojë për Kosovën. Pnishi shprehet se ndeshja ndaj Shqipërisë është speciale.

“Po ndihem shumë mirë që po përfaqësoj Kosovën. Ne jemi duke u përgatitur maksimalisht për ndeshjen ndaj Shqipërisë, që është shumë e veçantë. Për mua është një debutim special, pikërisht ndaj Shqipërisë. Unë jam i gatshëm të jap kontributin tim dhe shpresoj se do të fitojmë. Më ka ftuar edhe dy herë më parë Kosova, por për shkak të lëndimit, nuk kam arritur të luaj, derisa nuk kam pasur kontakte me Shqipërinë. Jam i përqendruar te Kosova, e për të ardhmen të shohim”, theksoi mbrojtësi i Grashoppersit për albinfo.ch.

Ai thotë se do të japin maksimumin në çdo ndeshje për Kosovën.

“Debutimi im është special dhe ne jemi të gatshëm të japim maksimumin. Grupi i lojtarëve është shumë i mirë dhe premtues për të ardhmen”, nënvizoi Pnishi.

Pnishi këtë edicion ka treguar paraqitje mjaft të mira me Grasshoppersin, duke qenë njëri ndër lojtarët më të mirë në këtë sezon.