Shqipëri: Ministria e Jashtme, me informacion të rëndësishëm për ata që udhëtojnë jashtë vendit

Pas rekomandimit zyrtar nga Këshilli i Bashkimit Evropian, të gjitha misionet shqiptare në vendet e BE-së janë udhëzuar të marrin dhe të publikojnë informacionin e saktë mbi rregullat që janë në fuqi në secilin vend anëtar, për hyrjen në territorin e tyre të shtetasve të huaj.

Xhaçka sqaron informacionin që do të përditësohet dhe se është i aksesueshën në faqen zyrtare të Ministrisë së Jashtme.

“Ministria për Evropën dhe Punët e Jashtme, nisur nga situata e krijuar prej kufizimeve të lëvizjes së lirë të udhëtarëve jashtë vendit, me qëllim parandalimin e situatave problematike, do të informojë në kohë reale për çdo ndryshim të këtij regjimi që lidhet me lëvizjen e qytetarëve shqiptarë. Këshilli i BE-së ka rekomanduar Shqipërinë në listën e vendeve, të cilat mund të rifillojnë lëvizjen e lirë drejt vendeve të Bashkimit Evropian. Por, disa prej vendeve të BE-së mund të kenë protokolle specifike, edhe pas këtij rekomandimi të fundit, ndaj duhet të lexoni informacionet e përditësuara rast pas rasti dhe sipas çdo shteti. “KUJDES! Është e udhës që përpara çdo udhëtimi në vendet e BE-së dhe në vende të tjera të botës, qoftë për turizëm apo punë, sigurohuni të keni informacionin e duhur për destinacionin tuaj, duke klikuar në adresën e mëposhtme”: https://punetejashtme.gov.al/al/informacion-mbi-levizjen-e-shtetasve-shqiptare-ne-shtetet-e-huaja.