Rënie infektimesh në Shqipëri: 33 raste në 24 orët e fundit

Është bërë e ditur se në 24 orët e fundit janë konfirmuar si të infektuar me koronavirus 33 raste të reja në Shqipëri, duke shënuar një rënie të ndjeshme infektimesh krahasuar me një ditë më parë, kur pati 71 infektime, përcjell albinfo.ch.

Sipas raportit, të infektuarit e fundit janë kryesisht raste të reja në proces hetimi si dhe kontakte të rasteve të konfirmuara më herët pozitive.

Shpërndarja gjeografike e të identifikuarve pozitivë në 24 orët e fundit është si vijon: 23 të prekur në Tiranë, 8 në Shkodër dhe nga 1 rast në Pogradec dhe Kamëz.

Lajmi i mirë është se në 24 orët e fundit janë shëruar 25 qytetarë, duke e çuar në 1159 numrin e të shëruarve që nga fillimi i epidemisë.

Aktualisht në shërbimin infektiv po marrin trajtohen 82 pacientë, 10 prej tyre janë në terapi intensive, ndërsa 1 është i intubuar.

Në vendin tonë janë aktualisht 792 persona aktivë me Covid-19, kryesisht në Tiranë, Shkodër, Durrës.

Shpërndarja gjeografike e rasteve aktive sipas qarqeve Tiranë 366; Durrës   150; Shkodër 133; Vlorë 54; Fier 37; Korçë 18; Lezhë 14; Elbasan 10; Kukës 8; Gjirokastër 1 dhe Berat 1.

Ministria e Shëndetësisë dhe Mbrojtjes Sociale apelon për vetëndërgjegjësim qytetarët, që të jenë të kujdesshëm në zbatimin e masave të vendosura: për të ruajtur distancën fizike prej 1.5 metër nga njëri-tjetri, për të ruajtur higjienën personale dhe për të mbajtur maskat kudo ku nuk respektohet dot distanca.

Bizneset të zbatojnë me korrektësi protokollet e sigurisë në punë: të dezinfektojnë ambientet, të kryejnë ajrosjen rregullisht, të përdoren maskat apo barrierat mbrojtëse në çdo subjekt shërbimi për qytetarët, siç e përcaktojnë protokollet e autoriteteve shëndetësore.

Shkelja e rregullave nga kushdo do të konsiderohet rrezik për jetën dhe shëndetin e të tjerëve.

Specialistja e Institutit të Shëndetit Publik, Eugena Tomini, apeloi që të shmanget çdo lloj grumbullimi, pasi janë rrezik për përhapjen e infeksionit.

“Familjarët e pacientëve në spitale të shmangin sa më shumë vizitat, kurse të moshuarit kur është e mundur të shmangin kontaktet me qendrat shëndetësore, por të kontaktojnë nëpërmjet telefonit me mjekun e familjes për barnat me rimbursim. Telefoni në linjën e gjelbër 0800 40 40 me mjekun tuaj të familjes, për këshillim psikologjik apo informacion për Covid-19. Nëse keni shenja klinike, nëse dyshoni se jeni i prekur me Covid-19, është e rëndësishme të qëndroni të izoluar dhe telefononi Urgjencën Kombëtare në numrin 127”, deklaroi Tomini.

Ministria e Shëndetësisë dhe Mbrojtjes Sociale u drejtohet qytetarëve të tregojnë kujdes në ambientet e punës, aty ku ofrohen shërbime dhe në çdo ambient publik, për të respektuar masat e higjienës, distancës fizike, shmangni kontaktet dhe vendosni maskat kur nuk është e mundur të ruhet distanca.

Covid-19 – Statistika 22 qershor 2020

---