Shqipëria drejt fitores ndaj Covid-19

Në 24 orët e fundit janë regjistruar vetëm pesë raste, kurse vetëm nëntë persona janë në spitalin infektiv

Ministrja e Shëndetësisë e Shqipërisë, Ogerta Manastirliu ka dhënë një lajm mjaft të mirë.

Përmes një postimi në rrjete sociale ajo shkruan se numri i rasteve aktive me Covid-19 vijon të ulet në të gjithë vendin, ndërkohë që në spitalin Infektiv po trajtohen vetëm 9 pacientë të infektuar me koronavirus, përcjell albinfo.ch.

Ndërkohë, kujtojmë se, procesi i vaksinimit po ecën me ritme të shpejta në Shqipëri, ndërsa kur kanë mbetur edhe pak javë nga përfundimi i afatit përfundimtar për të arritur në 1 milion vaksina, deri më tani janë kryer rreth 850 mijë vaksinime.

Fushata e vaksinimit ka nisur që prej muajit janar me vaksinën Pfizer, AstraZeneca, si dhe Sinovac dhe Sputnik V, që nuk e kanë marrë ende certifikimin e EMA-s.

Dje, Bashkimi Evropian hoqi kufizimet e udhëtimeve me Shqipërinë duke e shpallur vend të sigurt, sa i takon Covid-it.

Ndërkohë, në 24 orët e fundit janë regjistruar vetëm 5 raste pozitive, kurse 132 janë aktivë. Shtatë qytetarë janë shëruar.

---