Shqipëria promovon ofertën turistike në Panairin në Beograd

Në Panairin ndërkombëtar “Wine Vision”, që po zhvillohet në Beograd, Shqipëria po prezanton ofertën e saj turistike në një stendë të përbashkët me Serbinë dhe Maqedoninë e Veriut. Vizitorëve u ofrohen informacione dhe përvoja nga destinacionet më tërheqëse natyrore, pasuritë kulturore dhe tradita artizanale shqiptare, raporton atsh përcjell albinfo.ch.

Gjatë tryezave të punës u shkëmbyen përvoja mes tre vendeve, duke vënë theksin te ruajtja e trashëgimisë kulturore dhe promovimi i vlerave autentike. Atmosferën e ngrohu Ansambli i Këngëve dhe Valleve Popullore, i cili solli ritmin dhe energjinë e kulturës shqiptare.

Agjencia Kombëtare e Turizmit nënvizoi se ky panair është një mundësi shumë e mirë jo vetëm për promovimin e kantinave shqiptare, por edhe për zgjerimin e bashkëpunimit rajonal dhe afrimin me tregjet ndërkombëtare.

Gjatë aktivitetit, Drejtoresha e Përgjithshme e AKT-së, Zana Çela, zhvilloi takime me drejtues të turizmit të Serbisë, ndër ta me Marija Labović dhe zv.ministren e Turizmit, Višnja Rakić. Bisedimet u përqendruan te krijimi i ofertave të përbashkëta turistike, veçanërisht për tregjet e largëta si Kina dhe SHBA-ja, si dhe te organizimi i eventeve të përbashkëta.

Shumë media të huaja shfaqën interes për zhvillimin e turizmit shqiptar në dy vitet e fundit.

Në këtë edicion të tretë të panairit “Wine Vision” marrin pjesë 38 vende nga e gjithë bota, ndërsa Shqipëria përfaqësohet nga 7 kantina.