Shqipëria, në vend të parë të sugjerimeve turistike për amerikanët

BestLife: Shqipëria, vend mahnitës

Media e njohur online, BestLife, ka publikuar 13 destinacione mahnitëse që mund të vizitohen nga turistët amerikanë gjatë këtij sezoni, transmeton albinfo.ch.

Teksa udhëtimet turistike në vende të ndryshme të botës janë tepër të vështira për shkak të masave të rrepta kundër përhapjes së koronavirusit, mediat e huaja po e shohin Shqipërinë më tërheqëse për ta vizituar.

Surpriza është Shqipëria në vendin e parë. Rekomandimi kryesor i këtij portali janë plazhet shqiptare, malet, sitet e shumta arkeologjike dhe klima e jashtëzakonshme mesdhetare. Një tjetër avantazh, për turistët amerikanë, është se nuk u kërkohet një test negativ për COVID-19 në aeroport, siç ndodh në shumicën dërmuese të vendeve të botës. Ndërsa maska është e detyrueshme në ambientet publike në gjithë vendin, nënvizon BestLife.

E dyta pas Shqipërisë renditet Bjellorusia, ndërsa nga vendet e rajonit, në listë bën pjesë Maqedonia e Veriut, ku po ashtu nuk janë të nevojshme të faktohen rezultatet negative të testit COVID-19, siç ndodh në Serbi e Mal të Zi, që përfshihen po ashtu në listë. /Albinfo.ch

---