Shqipëria shënon 17 vjet në NATO

Ministri për Evropën dhe Punët e Jashtme, Ferit Hoxha, theksoi se anëtarësimi në NATO forcoi sigurinë kombëtare dhe rolin e Shqipërisë në stabilitetin e Ballkanit Perëndimor.

Shqipëria shënon sot 17-vjetorin e anëtarësimit në NATO, një moment historik që konsiderohet si një nga arritjet më të rëndësishme në rrugëtimin euro-atlantik të vendit dhe në konsolidimin e sigurisë kombëtare, përcjell albinfo.ch.

Me këtë rast, ministri për Evropën dhe Punët e Jashtme, Ferit Hoxha, përmes një postimi në rrjetin social X, e cilësoi këtë përvjetor si një hap vendimtar që forcoi themelet strategjike të Shqipërisë dhe orientimin e saj të qartë drejt Perëndimit.

Hoxha theksoi se që prej anëtarësimit në Aleancë, Shqipëria ka dëshmuar se është një aleate e përkushtuar dhe e besueshme, duke marrë pjesë aktive në misionet dhe operacionet e NATO-s, si dhe duke kontribuar në ruajtjen e stabilitetit në rajonin e Ballkanit Perëndimor.

Sipas tij, Shqipëria sot është plotësisht e harmonizuar me prioritetet e Aleancës, duke përfshirë rritjen e investimeve në mbrojtje, ndarjen e përgjegjësive dhe përqafimin e inovacionit dhe teknologjive të reja në një mjedis sigurie gjithnjë në ndryshim.

Ministri nënvizoi gjithashtu se Shqipëria po përgatitet të presë për herë të parë një samit të NATO-s në rajon, duke e cilësuar këtë zhvillim si një dëshmi të besimit që Aleanca ka ndaj rolit dhe kontributit të Shqipërisë.

Në përfundim, Hoxha theksoi se në një botë gjithnjë e më të pasigurt, Shqipëria mbetet e palëkundur përkrah aleatëve, e përkushtuar ndaj mbrojtjes kolektive dhe ruajtjes së paqes, lirisë dhe vlerave të përbashkëta.

Shqipëria u bë anëtare me të drejta të plota e NATO-s më 1 prill 2009, së bashku me Kroacinë, gjatë një ceremonie zyrtare në Uashington. Procesi i anëtarësimit kishte nisur më herët, me përfshirjen në programin “Partneriteti për Paqe” në vitin 1994 dhe përshpejtimin e reformave në fushën e mbrojtjes dhe sigurisë, të cilat kulmuan me ftesën zyrtare në Samitin e Bukureshtit në vitin 2008.

Ky anëtarësim shënoi një kthesë strategjike për Shqipërinë, duke e vendosur vendin në arkitekturën euro-atlantike të sigurisë dhe duke garantuar një rol më të fuqishëm në bashkëpunimin ndërkombëtar./Albinfo.ch

---