Shqiptarët e Langenthalit heqin dorë nga ndërtimi i minares

Komuniteti islam shqiptar ka vendosur të mos e çojë çështjen e xhamisë në Gjykatën Federale, siç kishte paralajmëruar kohë më parë

Bashkësia Islame Shqiptare në Langenthal të Bernës ose siç është bërë e njohur edhe në shtypin zviceran “Xhamia e Langenthalit”, ka hequr dorë nga ngritja e minares në ndërtesën e planifikuar të xhamisë dhe qendrës kulturore islame.

Komuniteti islam shqiptar i këtij qyteti ka vendosur të mos e çojë çështjen e xhamisë në Gjykatën Federale, siç kishte paralajmëruar kohë më parë.

Ky komunitet, siç bëjnë të ditur mediet zvicerane, ka premtuar që të mos e ndërtojë minaren në rast se kjo bie në kundërshtim me kriteret e ndërtimit që vlejnë për qytetin e Langenthalit. Kjo me kusht që autoritetet e drejtësisë të shprehin një qëndrim të tillë, ka thënë avokati përfaqësues i komunitetit.

Gjykata administrative e Bernës në fillim të prillit ishte shprehur se minarja nuk mund të ndërtohet për arsyen se bie në kundërshtim me kriteret e ndërtimit në këtë lokalitet. Minarja është thjesht një ngrehinë simbolike dhe jo një aneks i kulmit të ndërtesës, thuhet në qëndrimin e gjykatës në fjalë.