Shqiptarët e Zvicrës: Në mes të heronjve të futbollit dhe vrasësve nga parkingu

Në mes të heronjve të futbollit dhe vrasësve nga parkingu, në Zvicër jetojnë rreth 250 mijë burra e gra që i takojnë popullatës shqiptare. Ata ankohen se për ta flitet shpesh ndërsa me ta, shumë rrallë. Ne kemi folur me ta, thuhet në artikullin në të cilin parakalojnë: dr. Omer Xhemaili, kardiokirurg i famshëm, Kështjella Pepshi, ish Mis Kosova dhe politikane, Arsim Hyseni, afarist dhe kryetar i FC Kosova të Cyrihut etj.

Revista mujore zvicerane Beobachter ka publikuar në numrin e saj më të ri një dosje që provon të merret me imazhin e shqiptarëve të Zvicrës përtej klisheve të njohura, kryesisht negative. Ajo me këtë rast ka bërë portretimin e disa prej personaliteteve shqiptare të cilët në Zvicër kanë arritur sukses në fushën ku punojnë. Shumica e personave janë përzgjedhur në bashkëpunim me albinfo.ch.

Në hyrje të dosjes së gjerë, gazetari merret me imazhin jo të mirë të  shqiptarëve dhe me nevojën që ky imazh të përmbyset  ose të kthehet në suaza të normalitetit.

“Ngasës të shpejtë të makinave, maço ballkanikë, shitës droge, vrasës nga parkingu, shpërdorues ndihmash sociale: prej më shumë se njëzet vitesh shqiptarët janë gogoli i kombit. Nuk kalon pothuaj asnjë krim me pjesëmarrje të shqiptarëve e që të mos përtypet me lezet nga mediat bulevardeske. Në këtë lojë të padrejtë merr pjesë edhe politika, sikur për shembull në rastin e sloganit të SVP-së “Kosovarët therin zviceranin”, me të cilin mblodhën nënshkirme për fushatën e iniciativës kundër migracionit masive në vitin 2011.

Por, në mes të tiradave të sharjeve, shqiptarët herë pas here kanë marrë edhe ndopak dashuri. Para së gjithash kur ata jepnin performanca të jashtëzakonshme futbolli për Zvicrën, transmeton albinfo.ch. Shansin e ardhshëm për ta bërë këtë, e kanë më 11 qershor, në duelin kundër Shqipërisë. Shumë nga lojtarët e kombëtares zvicerane mund të luanin pa problem për Shqipërinë por ata janë përcaktuar për Zvicrën, atdheun e tyre, shkruan më tutje Beobachter.

Në mes të heronjve të futbollit dhe vrasësve nga parkingu, në Zvicër jetojnë rreth 250 mijë burra e gra që i takojnë popullatës shqiptare. Ata ankohen se për ta flitet shpesh ndërsa me ta, shumë rrallë. Ne kemi folur me ta, thuhet në artikullin në të cilin parakalojnë: dr. Omer Xhemaili, kardiokirurg i famshëm, shqiptari i parüë që ka bërë transplantim të zemrës, Kështjella Pepshi, ish Mis Kosova dhe politikane, Arsim Hyseni, afarist dhe kryetar i FC Kosova të Cyrihut, Blerim Tatari, këngëtar repi, etj. Vetëm yje futbolli nuk ka në mesin e tyre dhe, sigurisht, as kriminelë, duke ndjekur përcaktimin nga hyrja e artikullit.

albinfo.ch në ditët në vazhdim do të publikojë, të përkthyer në gjuhën shqipe edhe disa nga portretet e përfshira në dosjen e revistës Beobachter.