Shtetasit maqedonas, më të deportuarit nga Gjermania

Keystone - @acalmelor

Bëhet e ditur se numri i personave të dëbuar nga Gjermania këtë vit është dukshëm më i lartë krahasuar me vitin e kaluar. Në tremujorin e parë të vitit 2024, numri i dëbimeve u rrit me një të tretën, shkruan gazeta Neue Osnabrücker Zeitung, sipas Deutsche Welle, përcjell albinfo.ch.

Thuhet se këto të dhëna janë të qeverisë gjermane, të deklaruara në përgjigjen e një pyetjeje parlamentare nga partia e Majtë. Sipas tyre, nga janari deri në mars të këtij viti nga Gjermania janë dëbuar 4791 persona, ose rreth 34% më shumë krahasuar me të njëjtën periudhë të vitit të kaluar.

Në të njëjtën kohë Maqedonia është në krye të listës së dëbimeve. Në tremujorin e parë të vitit 2024, 483 qytetarë të Maqedonisë së Veriut u dëbuan nga Gjermania. Gjatë gjithë vitit të kaluar 2023 janë deportuar 1177 shtetas të Maqedonisë. Nga 483 shtetas të dëbuar të Maqedonisë në tremujorin e parë të vitit 2024, 233 ishin gra dhe 227 të mitur.

Në vendin e dytë për nga numri i dëbimeve është Turqia, ku janë kthyer 449 shtetas. Pasohet nga Gjeorgjia (416), Afganistani (345) dhe Serbia (312).