Shumica do ta votonin iniciativën 1:12

Për këtë iniciativë sot do të votonin 55% e zviceranëve. Kundër do të ishin vetëm 28% dhe 17% janë ende të pavendosur

Iniciativa 1:12, rreth të cilës votuesit zviceranë do të japin verdiktin në muajin nëntor, ka gjasa shumë të mira që të dalë fituese. Për këtë iniciativë, e cila lufton kërkon që dallimet e pagave nëpër ndërmarrje të mos jenë më të mëdha se 1:12, sot do të votonin 55% e zviceranëve. Kundër do të ishin vetëm 28% dhe 17% janë ende të pavendosur.

Këto rezultate i ka sjellë një sondazh i realizuar online me 475 respodentë, nga Instituti për hulumtimin e tregut “Marketagent”, nga 3 deri më 10 maj 2013, me sponsorim të gazetës “Schweiz am Sonntag”.

Iniciativa 1:12, që është nisur nga Juso (socialistët e rinj) më mirë është pritur nga femrat, të cilat kanë votuar 61% në favor të saj, ndryshe nga meshkujt , 49% të të cilëve kanë qenë pro.

Dallime janë shënuar edhe në baza regjionale, gjuhësore. Kështu, në Zvicrën perëndimore (frankofone) pëlqimin e tyre e kanë dhëne 61.5% ndërkohë që në atë gjermane, 53%. Nga ana tjetër, janë simptomatike edhe diferencat që janë regjistruar në mes të grupmoshave, sa i takon pëlqimit ose jo të kësaj iniciative. Kështu, të rinjtë në mes 18 dhe 29 vjeçarë, me 53% janë më skeptikë në raport me iniciativën 1:12 se sa personat më të moshuar, nga 50 deri në 69 vjeçarë, të cilët janë shprehur me 58% në të mirë të saj.

Sipas sondazhit, 69% të të pyeturve i konsiderojnë të papranueshme pagat milionëshe të menaxherëve të lartë ndërsa 31% i konsiderojnë ato normale.