Si do të ndikonte nisma zvicerane kundër imigracionit në universitete?

Nëse votuesit zviceranë do të mbështesnin propozimin e krahut të djathtë për të frenuar numrin e të huajve që vijnë në Zvicër, kjo do të kishte një efekt “katastrofik” në universitetet e vendit, paralajmëron një ekspert.

Iniciativa kontroverse “Jo 10 milionëve” e Partisë Popullore Zvicerane (SVP) synon të zvogëlojë në mënyrë drastike fluksin e të huajve në Zvicër, në mënyrë që popullsia e vendit të mos kalojë shifrën prej 10 milionësh, të cilën partia populiste thotë se do të mbingarkojë infrastrukturën kyçe, siç janë strehimi, transporti publik, sistemi shëndetësor dhe shkollat.

Kjo ka shkaktuar kundërshtim nga Këshilli Federal, Parlamentet, ekonomistët, organizatat e punëdhënësve, sindikatat dhe një koalicion shumëpartiak, të cilët të gjithë po japin alarmin për pasojat që një masë e tillë do të kishte në ekonominë dhe marrëdhëniet e Zvicrës me Bashkimin Evropian.

Tani një zë tjetër i shtohet opozitës masive

Sipas Luciana Vaccaro, presidente e “Swissuniversities”, një grup ombrellë për institucionet e arsimit të lartë, pranimi i kësaj mase në një referendum më 14 qershor do të kishte një efekt “katastrofik” në universitetet e Zvicrës.

Arsyeja: “Rreth gjysma e profesorëve në universitetet tona janë shtetas të huaj”, tha ajo.

Në fakt, përqindja e profesorëve që vijnë nga jashtë është edhe më e lartë në universitetet kryesore.

Për shembull, Instituti Federal Politeknik i Lozanës (EPFL), “mban një fakultet shumë ndërkombëtar, me një shumicë të konsiderueshme të profesorëve të tij që vijnë nga jashtë Zvicrës”, – 82 përqind, raporton thelocal, transmeton albinfo.ch.

Dhe në shkollën e tij simotër, ETH në Cyrih, 65-70 përqind e të gjithë profesorëve janë shtetas të huaj, me përqindjen që arrin deri në 83 përqind midis profesorëve asistentë.

Ndikimi edhe në kërkim

Për më tepër, Vaccaro theksoi se universitetet zvicerane janë ndër më të mirat në botë sepse ato tërheqin studiues të nivelit të lartë nga jashtë dhe krijojnë partneritete ndërkombëtare.

Kjo ka qenë e mundur, kryesisht, për shkak të traktateve dypalëshe – përkatësisht marrëveshjes së Lëvizjes së Lirë të Personave – që Zvicra ka me Bashkimin Evropian.

Megjithatë, pranimi i propozimit të SVP-së do ta vinte këtë marrëveshje në rrezik; kjo do t’i jepte fund në mënyrë efektive aksesit të Zvicrës në programet kërkimore të BE-së, duke zvogëluar konkurrueshmërinë ndërkombëtare të vendit.

“Nëse na kërkohet të ndërpresim marrëveshjet që lidhen me lëvizjen e lirë të personave, rrezikojmë përsëri të përjashtohemi nga Horizon Europe, Erasmus+, Digital Europe ose Euratom – disa nga programet kryesore kërkimore në botë”, tha Vaccaro.

“Kjo do të ishte shkatërruese për Zvicrën”, shtoi ajo.

---