Si u “fundos” Tirana

Mbrëmjen e kaluar, autostrada Tiranë-Durrës u bllokua tërësisht, ndërsa mëngjesin e sotëm u bë i munduar kalimi vetëm në njërin krah të autostradës

Foto nga Erion Veliaj në Facebook

Motit me reshje të dendura, që solli edhe përmbytje në pjesën më të madhe të vendit, nuk i shpëtoi as kryeqyteti shqiptar.

Madje, mbrëmjen e kaluar, autostrada Tiranë-Durrës u bllokua tërësisht, ndërsa mëngjesin e sotëm u bë i munduar kalimi vetëm në njërin krah të autostradës.

Top Channel ka siguruar një video të filmuar nga operatori Elis Kruja me “dron”, e cila tregon përmbytjen në zonën e autostradës, pranë edhe një qendre tregtare, e cila u përmbyt mbrëmjen e kaluar, përcjell albinfo.ch.

Edhe kryetari i Tiranës, Erion Veliaj gjatë ditës ka dalë në vendin e ngjarjes për të parë situatën nga afër.

Ndërkohë, niveli i ujit në, Lumin e Vjosës në zonën e Përmetit tregon se pas disa orësh zonat fushore në rrjedhën e këtij lumi, kryesisht në Fier dhe Vlorë do të përmbyten.

Ushtria po largon banorët dhe gjënë e gjallë nga zonat që janë përmbytur edhe më parë. Energjia elektrike mungon në shumë zona.

Parashikimet janë që gjatë orëve të natës prurjet të shtohen, ndërkohë që Shtabi i Emergjencave në Qarkun e Fierit raporton se ka evakuuar 1500 banorë në fshatrat Ferras, Çerven e Koshisht, ndërkohë që deri më tani, 180 hektarë tokë bujqësore është nën pushtetin e ujit, raporton “TCH”.

Problematike situata paraqitet edhe në Qarkun e Vlorës, kryesisht në Novoselë. Edhe këtu, niveli i Vjosës rritet me ritme të frikshme, përcjell albinfo.ch.