Situatë kaotike në Shkodër, protestuesit përleshen me policinë

Situatë e tensionuar paraqitet aktualisht në qytetin e Shkodrës, ku po zhvillohet takimi elektoral i kryeministrit Edi Rama. Protestuesit e opozitës janë përleshur me forcat e policisë, duke kundërshtuar praninë e Ramës.

TCH raporton se policia ka përdorur edhe gazin lotsjellës për të bërë të mundur shpërndarjen e protestuesve, ndërsa këta të fundit janë kundërpërgjigjur me gurë dhe sende të tjera.

Mbështetësit e opozitës vijojnë të qëndrojnë pranë sheshit ku po mbahet mitingu elektoral i Partisë Socialiste. “Rama ik” është thirrja më e shpeshtë që dëgjohet nga protestuesit, përcjell Albinfo.ch.

Edhe kryebashkiakja Voltana Ademi ka zbritur në shesh për t’iu bashkuar protestës së opozitës që kundërshton praninë e kryeministrit Edi Rama në Shkodër. Ademi u shpreh pak minuta më parë se shkodranët nuk do të lejojë uzurpimin e qytetit nga një kriminel si Edi Rama. Menjëherë sapo Voltana Ademi është afruar pranë kordonit të policisë, ndaj saj u hodh gaz lotsjellës. PD e konsideroi veprimin e policisë ndaj kryebashkiakes si një akt të paprecedent.

Gjatë përplasjeve, një grup protestuesish kanë tentuar të rrëmbejnë një auto-ambulancë për të çarë kordonin e policisë. Ishte sërish ndërhyrja me gazit lotsjellës që bëri të mundur që kjo përpjekje të mos realizohej.

“Më 1 korrik ose do të jemi në burg politik si Bardh Spahia dhe shumë qytetarë të tjerë, ose do të jemi në emigrim masiv”, u shpreh Ademi në një deklaratë të dytë.