Sommaruga: Ndjekja penale e Sylës, në bazë të detyrës zyrtare

Kështu i është përgjigjur ministrja e drejtësisë, pyetjes së bërë nga deputeti Luzzi Stamm lidhur me përgjegjësinë penale të Azem Sylës

Në faqen zyrtare të Parlamentit të Zvicrës mund të lexohet një informatë e përmbledhur lidhur me pyetjen që një deputet i ka bërë ministres së drejtësisë rreth përgjegjësisë penale të deputetit kosovar Azem Syla.

Ministrja e drejtësisë Simonetta Sommaruga, në seancën e djeshme parlamentare, duke iu përgjigjur pyetjes së bërë nga deputeti i SVP-UDC (Partia Popullore e Zvicrës) Luzzi Stamm lidhur me përgjegjësinë penale të politikanit kosovar Azem Syla, është përgjigjur se veprat penale për të cilat dyshohet i lartpërmenduri janë vepra që ndiqen nga detyra zyrtare, pra pa ngritur padi private. Ajo ka thënë më tutje: “politikani kosovar ka qëndruar për shumë vite në Zvicër. Në raporte të ndryshme është ngritur dyshimi se Azem Syla gjatë qëndrimit të tij në vendin tonë është implikuar në veprime penale.

Fjala është për tregti me organe, vrasje ose delikte tjera kundër trupit dhe jetës. Te deliktet e përmendura fjala është për delikte që ndiqen nga detyra zyrtare (ex oficio). Autoritetet përgjegjëse të hetimit , në rast të ekzistimit të indiceve të mjaftueshme duhet të aktivizohen në mënyrë të pavarur, ka thënë Sommaruga.

Sipas rregullit, kompetente për deliktet e përmendura janë autoritet ndjekëse në vendin e banimit ose të kryerjes së veprimit penal të personit në fjalë. Ndërsa kompetenca e Prokurorisë Federale do të ishte e bazuar në rastin kur personi dyshohet për anëtarësi në një organizatë kriminale.

Por, Qeveria Federale nuk ka mundësi t`ia besojë Prokurorisë Federale hetimin mbi përgjegjësinë penale lidhur me rastin”, ka përfunduar ministrja federale e drejtësisë, Simonetta Sommaruga, duke iu përgjigjur pyetjes së deputetit Luz Stamm lidhur me püërgjgjüesinë penale të politikanit kosovar, Azem Syla.