Sot ishte dita më e ngrohtë e këtij viti në Zvicër: 24.4 gradë

Kjo temperaturë është regjistruar sot në Binningen të Bazelit, ndërsa ngjashëm ishte edhe në pothuaj gjithë Zvicrën

Moti i ngrohtë pranveror në gjithë Zvicrën kishte filluar disa ditë më parë ndërsa ditën e shtunë, sot, temperaturat për pak nuk kanë kapur lartësitë që janë karakteristike për verën.

24.4 gradë celsius ka qenë temperatura më e lartë e matur sot në Zvicër, duke e bërë kështu 20 prillin ditën më të ngrohtë deri tash të këtij viti. Kjo temperaturë është regjistruar sot në Binningen të Bazelit, shkruan Meteonews në twitter.

Edhe dje në po këtë lokalitet të Bazelit është shënuar temperetura më e lartë në Zvicër deri atëherë, 23.4 gradë celsius.

Por, temperatura të ngjashme kanë mbretëruar edhe në shumë vende tjera, transmeton albinfo.ch. Kështu, në Gösgen AG zhiva në termometër ka arritur 24 gradët.

Po ashtu në shumë vende buzë liqeneve e lumenjve janë parë skena të ngjashme me ato të verës: njerëz me rroba plazhi të shtrirë buzë ujit, duke bërë banjo dielli. Për zhytje në ujë ndërkaq duhet të pritet edhe ca kohë, pasi që temperaturat e ujit janë ende mjaft të ftohta.

Përveç tempüeraturave të larta, edhe diçka tjetër ua ka kujtuar zviceranëve stinën e verës, shkruan albinfo.ch. Kanë qenë vetëtimat dhe stuhitë tipike verore që janë parë gjatë ditës së sotme në regjionin e Beernës dhe atë të Solothurnit.

Meteorologët parashohin që ky mot i ngrohtë të mbretërojë të paktën deri në fund të Pashkëve.

---