Sot mbahet takimi Kurti – Vuçiq

Sot në Bruksel, takimi i nivelit të lartë Kurti-Vuçiq

 

Të enjten e 14 shtatorit, kryeministri i Kosovës, Albin Kurti, dhe presidenti i Serbisë, Aleksandër Vuçiq, takohen në Bruksel, në kuadër të dialogut për normalizimin e marrëdhënieve, përcjell albinfo.ch.

Bashkimi Evropian, si ndërmjetësues i procesit, ka bërë të ditur se takimet nisin nga ora 09:00.

Fillimisht, shefi i politikës së jashtme të BE-së, Josep Borrell, dhe i dërguari i BE-së për dialogun Kosovë-Serbi, Miroslav Lajçak, presin njërin lider, pastaj tjetrin.

Takimi trepalësh do të mbahet më vonë gjatë ditës dhe temë diskutimi do të ketë zbatimin e Marrëveshjes për normalizimin e marrëdhënieve.

Ndryshe, njohësit e çështjeve politike i kanë shprehur pritshmëritë e tyre për këtë takim.

Ata vlerësojnë se dialogu është në vdekje klinike dhe se ky takim nuk do të sjellë ndonjë rezultat konkret, teksa theksojnë se tema kyçe e këtij takimi pritet të jetë Marrëveshja e Ohrit, deeskalimi dhe zgjedhjet në veri të Kosovës.

Ky takim në mes të Kurtit dhe Vuçiqit është i pari prej kur janë rritur tensionet në veri të Kosovës.

 

---