Sot përpjekja e 39-të për konstituimin e Kuvendit të Kosovës

Të dielën, më 29 qershor, nga ora 11:00, deputetët e zgjedhur të legjislaturës së nëntë do të mblidhen për herë të 39-të në përpjekje për të përmbyllur procesin e konstituimit të Kuvendit të Kosovës, i cili po zvarritet prej më shumë se dy muajsh për shkak të mungesës së konsensusit ndërmjet partive politike, raporton albinfo.ch.

Vazhdimi i seancës vjen një ditë pas takimit të së shtunës mes liderëve të partive të përfaqësuara në Kuvend. Por ky takim nuk solli ndonjë rezultat konkret për zhbllokimin e situatës, pasi Lëvizja Vetëvendosje, bashkë me partnerët e saj Guxo dhe Alternativa, ende nuk kanë siguruar numrat e mjaftueshëm për të zgjedhur Albulena Haxhiun në postin e kryetares së Kuvendit.

Në fokus të mosmarrëveshjeve është interpretimi i aktgjykimit të fundit të Gjykatës Kushtetuese, që sipas VV-së i jep të drejtë vazhdimit të seancës me të njëjtin format për votimin e kryetarit të Kuvendit. Ndërkohë, PDK dhe LDK këmbëngulin se çdo veprim i mëtejshëm pa formimin e një komisioni mbikëqyrës për votimin e fshehtë do të ishte në kundërshtim me Kushtetutën.

“Do të ketë shkelje kushtetuese nëse shkohet sërish me formatin e deritanishëm për propozimin dhe votimin e komisionit për votim të fshehtë,” deklaroi kryetari i PDK-së, Memli Krasniqi.

Ndërsa kreu i LDK-së, Lumir Abdixhiku, u shpreh se mosrespektimi i vendimit të Kushtetueses është “hapi i parë i përmbytjes së rendit kushtetues”, duke fajësuar për këtë Albin Kurtin dhe Lëvizjen Vetëvendosje.

Në një deklarim të mëvonshëm, kryetari i VV-së, Albin Kurti, akuzoi PDK-në dhe LDK-në për “keqinterpretim” të aktgjykimit. Ai theksoi se nëse Albulena Haxhiu nuk merr votat e nevojshme përmes një procesi të fshehtë votimi, ajo do të tërhiqet nga gara për postin e kryetares së Kuvendit.

Gjykata Kushtetuese ka vendosur që legjislatura e nëntë ka një afat prej një muaji për përfundimin e procesit të konstituimit, përkatësisht për zgjedhjen e kryetarit dhe nënkryetarëve të Kuvendit. Ky afat tashmë ka hyrë në ditët e fundit të tij, ndërkohë që bllokada politike mbetet e pazgjidhur, transmeton albinfo.ch.