Sot votohet në Serbi, shqiptarët garojnë me dy lista

(AP Photo/Visar Kryeziu)

Në Serbi këtë të dielë mbahen zgjedhjet e jashtëzakonshme lokale e parlamentare.

8 mijë e 273 qendra të votimit atje, do të jenë të hapur nga ora 07:00 deri në orën 20:00.

Të drejtë vote do të kenë 6.5 milionë qytetarë dhe zgjedhjet e Serbisë, nuk do të lejohen në Kosovë.

Qytetarët serbë që jetojnë në Kosovë do të mund të udhëtojnë për në Serbi, për ta shfrytëzuar të drejtën e tyre për votë.

Siç shkruan Radio Evropa e Lirë, ata do të mund të votojnë në katër qytetet në jug të Serbisë: në Vranjë, Kurshumli, Rashkë dhe Tutin, përcjell albinfo.ch.

Zëvendëskryeministri i Kosovës, Besnik Bislimi, u ka bërë thirrje shqiptarëve në Luginën e Preshevës të votojnë në zgjedhjet parlamentare në Serbi, duke thënë se “projekti serb për heshtjen e zërit shqip duhet të përballet me rezistencë e mosnënshtrim”.

Shqiptarët e Luginës garojnë këtë herë me dy lista. Në përbërjen e kaluar parlamentare, Shaip Kamberi ka qenë përfaqësuesi i vetëm i komunitetit shqiptar.

Disa sondazhe publike e nxjerrin partinë e presidentit aktual të Serbisë. Aleksandar Vuçiq, si fituese të zgjedhjeve, në rendin e dytë koalicionin e partive opozitare, dhe të tretën, Partinë Socialiste, të ish-ministrit të Jashtëm, Ivica Daçiq, që është partnere në koalicion me SNS-në, shkruan REL.