Sot, zgjedhjet për qeveritë komunale në Kantonin e Gjenevës

Për 137 vende, në 45 komuna, konkurrojnë 204 kandidatë partish të ndryshme

Sot në kantonin e Gjenevës zhvillohen zgjedhjet për qeveritë e 45 komunave sa ka kantoni. Për 137 vende konkurrojnë 204 kandidatë partish të ndryshme. Për qeverinë e komunës së qytetit të Gjenevës që përbëhet nga pesë anëtarë, garojnë dhjetë kandidatë, prej të cilëve tri femra.

Qeveria komunale e Gjenevës aktualisht mbizotërohet nga e majta: atë e përbëjnë katër politikanë të majtë dhe një i djathtë.

Partitë e majta janë unifikuar, duke formuar një listë të përbashkët, ndërsa e djathta paraqitet e përçarë në disa pjesë. Kësshtu, Partia Liberale, në Gjenevë garon ndaras nga FDP, ndërsa një nga kandidatet e saj madje ka hyrë në listën e SVP-së (UDC).

Nga ana tjetër lëvizja e djathtë populiste “Mouvement citoyens genevois” (Lëvizja Qytetare e Gjenevës” kandidon me listën e saj.

Nisur nga rezultatet e zgjedhjeve për këshilltarë komunash, të mbajtura muajin e kaluar, pritet që të rrezikohet shumica komode që ka e majta në qeverinë e qytetit të Gjenevës. Ky rrezik asaj i vjen nga Mouvement citoyens genevois.