SVP kërkon të ndalohet udhëtimi i azilkërkuesve jashtë vendit

SVP po kërkon ndalimin e udhëtimit jashtë vendit të refugjatëve dhe personave të cilët kanë aplikuar për azil në Zvicër.

Në një intervistë me gazetën “Tan”, njeriu i dytë i SVP-së, Adrian Amstutz njoftoi se këtë propozim partia do ta dërgojë  në Parlamentin e Zvicrës gjatë sesionit të vjeshtës.

Sipas Sekretariatit Shtetëror për Migracion, gjatë periudhës 2011-2015 janë leshuar rreth 50 mijë leje për refugjatët dhe azilkërkuesit për të udhëtuar jashtë vendit, kryesisht për të vizituar familjet e tyre apo për të marrë pjesë në funerale.

Deri tani shumica e kërkesave  për udhëtim jashtë vendit janë paraqitur nga eritreasit (15’158), e ndjekur nga Somalia (7118) dhe irakianët (3786).

“Lëvizja e shpeshtë” e refugjatëve e ka kundërshtuar deputetja nacionale e SVP-së, Sylvia FLUCKIGER.

Ajo supozon se shumë qytetarë nga Eritrea bëjnë pushime në shtëpi për të vizituar të afërmit e tyre.

Sipas Flukiger të gjithë ata që udhëtojnë për në shtëpitë e tyre do të duhet të humbin të drejtën e azilit.

Ligji lejon udhëtimin e azilkërkuesve për në shtëpitë e tyre vetëm nëse është pranuar përkohësisht statusi i tyre i refugjatit dhe i azilkërkuesve në raste të jashtëzakonshme.

Për udhëtimet e paligjshme në vendet afrikane  ka raportuar disa muaj më parë  “NZZ am Sonntag” duke përmendur diasporën e Eritresë.

Konsullata e Përgjithshme në Gjenevë e Eritreas organizon udhëtime në vendin e tyre dhe i kthejnë sërish në Zvicër.

Sekretariati i Shtetit për Migracioni nuk ka komentuar mbi numrin e rasteve të abuzimit të refugjatëve kur udhëtojnë jashtë vendit.