Të gjithë kërkojnë më shumë punëtorë në Zvicër

Po vazhdon rritja në tregun zviceran të punës. Gjendja nëpër kompani është e mirë dhe kjo është reflektuar edhe në planet e punësimit, bën të ditur Qendra Zvicerane për Hulumtime Ekonomike (KOF).

Treguesi i KOF për punësimin raporton një vlerësim të hershëm të gjendjes ekonomike të regjistruar në tremujorin e dytë të vitit 2018 me 3.6 pikë, edhe pse vetëm pak mbi nivelin e tremujorit të mëparshëm.

Megjithatë, vlera për tremujorin e parë është rishikuar dukshëm deri në 3.4 nga 2.8 pikë, shkruan albinfo.ch.

Për më shumë se gjysmë viti, tani ka më shumë kompani në Zvicër që mendojnë për krijimin e vendeve të punës sesa që duan të reduktojnë numrin e tyre.

Perspektivat pozitive janë reflektuar në të gjitha industritë, vazhdon KOF.

Perspektivat e punësimit ishin gjithashtu pozitive në fusha të caktuara, duke përfshirë sektorin e prodhimit, tregtinë me shumicë dhe nëpër banka.

Treguesi i Punësimit të KOF llogaritet nga sondazhet tremujore të bizneseve. Vlera e indikatorit pozitiv vjen nga një përqindje më e lartë e të anketuarve që dëshirojnë të krijojnë vende pune në muajt e ardhshëm në krahasim me ata që planifikojnë të kundërtën.