Të miturit shqiptarë: Një pjesë e rëndësishme e emigracionit të ri drejt Europës

@unsplash

Shqipëria vazhdon të jetë një nga vendet kryesore nga ku vijnë të miturit që marrin leje qëndrimi në Bashkimin Europian.

Sipas të dhënave të Eurostat për vitin 2024, nga 147.500 leje qëndrimi të dhëna për të mitur në Europë, rreth 19.000 (ose 13%) u takojnë qytetarëve shqiptarë. Kjo rendit Shqipërinë në vendin e tretë, pas Ukrainës (21%) dhe Bjellorusisë (15%).

Në nivel global, në vitin 2024 u dhanë gjithsej 540.000 leje qëndrimi për të mitur, ndërsa Europa përbën një pjesë të konsiderueshme prej 27% të tyre. Këto shifra tregojnë se çdo vit kontinenti përballet me një numër të madh të miturish që kërkojnë të integrohen në sistemet arsimore dhe sociale të vendeve anëtare të BE-së.

Rritja e numrit të kërkesave nga Shqipëria lidhet kryesisht me bashkimin familjar, ndërsa një pjesë tjetër e motivuar nga mundësitë për arsimim dhe për një jetë më të qëndrueshme në vendet pritëse.

Nga një perspektivë globale, Azia ka numrin më të madh të të miturve që marrin leje qëndrimi, me 201.000 fëmijë (37% e totalit botëror), ku në krye renditen Siria, Afganistani dhe India. Pas Azisë, Afrika përbën 21% të totalit global, me 112.000 të mitur, shumica nga Maroku, Egjipti dhe Nigeria.