Temperatura deri në 35 gradë u regjistruan të premten në Zvicër

Keystone EPA/ERDEM SAHIN

Vala e të nxehtit filloi të mbulojë Zvicrën të premten dhe pritet të vazhdojë të paktën deri të mërkurën. Gjeneva shënoi temperaturën më të lartë 34.8 gradë.

Temperaturat maksimale të regjistruara këtë të premte janë në përputhje me parashikimet deri në 34,8°C në Gjenevë, 34,6°C në Payerne (VD) dhe 34,5°C në Mathod (VD) dhe më shumë se 32°C në shumë rajone fushore, thotë MeteoSwiss, shkruan RTS.

“Këto vlera do të përgjithësohen në rajonet fushore të shtunën dhe në qytete, efekti i ishullit të nxehtësisë urbane mund të rrisë temperaturat disa gradë më të larta gjatë ditës dhe gjithashtu t’i mbajë ato më të larta gjatë netëve”, paralajmëron MeteoSwiss.

Gjatë fundjavës pritet të jetë edhe më nxehtë. Specialistët parashikojnë midis 31°C dhe 36°C në gjithë Zvicrën.

Disa qytete dhe kantone në pjesën frëngjishtfolëse të Zvicrës – veçanërisht Vaud, Gjeneva dhe Jura – kanë nisur plane për valën e të nxehtit, duke ftuar qytetarët që të jenë të kujdesshëm me përpjekjet fizike dhe të mbajnë temperaturën e akomodimit sa më të freskët që të jetë e mundur, përcjell albinfo.ch.

Rreziku nga zjarri nuk duhet neglizhuar në gjithë Zvicrën dhe më në rrezik është Valais.

Në vapë ekstreme, punëtorët e ndërtimit janë ndër të parët që vuajnë. Sindikata UNIA bëri thirrje që të mos hezitojnë të ndalojnë punën. Vala e të nxehtit gjithashtu inkurajon disa restorante që të përshtaten për të mbajtur klientët, shkruan RTS.