Thaçi: Duhet t’i japim fund armiqësisë me Serbinë

“Duhet t’i dhamë fund armiqësisë një shekullore dhe duhet të arrihet pajtim, dy shtetet duhet të ecin përpara në rrugën Evropiane. Marrëveshja midis Kosovës dhe Serbisë nënkupton stabilitet në Ballkanin Perëndimor”, theksoi ndër të tjera Thaçi

Ka përfunduar takimi joformal ndërmjet presidentit të  Kosovës, Hashim Thaçi dhe atij serb, Aleksandar Vuçiq. Ky takim është bërë me ndërmjetësimin e Federica Mogherini, përfaqësuese e Lartë të Bashkimit Evropian.

Bashkë-bisedimi ka zgjatur rreth një orë e gjysmë, ndërsa më herët Komisioni Evropian, ka thënë se qëllimi i këtij takimi ishte shkëmbimi i mendimeve lidhur me vazhdimin e dialogut për normalizimin e marrëdhënieve Kosovë-Serbi.

Presidenti Thaçi deklaroi Kosova dhe Serbia duhet të arrijnë marrëveshjen përfundimtare me njëra-tjetrën. “Kemi nevojë për komunikim jemi dy shtete të pavarura, kjo fazë e re e dialogut është e nevojshme që të kryhet sa më shpejt që është e mundur. Jemi dy shtete të pavarura dhe sovrane, por kemi nevojë për ndërtimin e marrëdhënieve fqinjësore dhe njohjen mes dy shteteve. Kosova dhe Serbia duhet të arrijnë marrëveshje përfundimtare”, u shpreh presidenti, përcjell albinfo.ch.

“Sot mes Kosovës dhe Serbisë kemi një komunikim më normal se qysh kemi pas me herët por jemi në një status kohë”, shtoi ai.

Sipas Thaçit tanimë sistemi i drejtësisë kosovare do të shtrihet përfundimisht në gjitha territorin e Kosovës sipas kushtetutës dhe ligjeve te Kosovës, ky proces do të përmbyllet deri me  17 tetor.

Thaçi tha se Kosova ka besim të madh tek zonja Mogherini, por edhe tek SHBA-të, njëherësh shtoi se duhet dhënë fund armiqësisë me Serbinë. “Duhet t’i dhamë fund armiqësisë një shekullore dhe duhet të arrihet pajtim, dy shtetet duhet të ecin përpara në rrugën Evropiane. Marrëveshja midis Kosovës dhe Serbisë nënkupton stabilitet në Ballkanin Perëndimor”, theksoi ndër të tjera Thaçi.