Thaçi kërkon që Kosova të ndihmojë Amerikën me 100 mijë dollarë

Thaçi ka kërkuar nga Qeveria e Kosovës ndarjen e 100.000 dollarëve ndihmë për popullin e Amerikës

Presidenti i Republikës së Kosovës, Hashim Thaçi, me anë të një postimi në “Facebook” ka shkruar se i ka përcjell nga afër përmbysjet në Hjuston të Teksasit për shkak të uraganit Harvey, përcjell albinfo.ch.

Thaçi ka kërkuar nga Qeveria e Kosovës ndarjen e 100.000 dollarëve ndihmë për popullin e Amerikës.

Ja postimi i plotë i Thaçit:

Bashkë me qytetarët e Republikës së Kosovës, me shqetësim dhe dhimbje, kam përcjell zhvillimet në Hjuston pas reshjeve dhe përmbytjeve masive të shkaktuara nga uragani Harvey, të papara ndonjëherë.

Ne, si shtet i ri, ende kemi probleme me varfërinë, por jemi popull solidar dhe që nuk harron kurrë ndihmën e popullit amerikan për Kosovën, kur ne ishim pllakosur nga vuajtjet e luftës në fund të shekullit të kaluar.

Prandaj, i bëj thirrje dhe kërkoj nga Qeveria e Republikës së Kosovës që sa më shpejt të marrë vendim për ndarjen e së paku 100.000 US$ në ndihmë të familjeve amerikane të prekura nga kjo katastrofë.

Jam i vetëdijshëm që kjo shumë është simbolike! Ne ndihmojmë me aq sa kemi, ashtu siç na e ka mësuar tradita e jonë shekullore. HTH