Thaçi në SHBA nënshkruan marrëveshje 49 milionë dollarëshe

Presidenti Thaçi udhëtoi për në Uashington për të nënshkruar një  marrëveshjen  mes Kosovës dhe MCC-së në vlerë 49 milionë dollarë

Presidenti i Kosovës, Hashim Thaçi, së bashku me koordinatorin nacional për Sfidën e Mijëvjeçarit në Kosovë (MCC), Petrit Selimi kanë udhëtuar për në Uashington të Shteteve të Bashkuara të Amerikës  për të nënshkruar një marrëveshjen  mes Kosovës dhe MCC-së me një vlerë rreth 50 milionë dollarë ndihmë për Kosovën.

Kjo marrëveshje do të nënshkruhet në prani të shumë kongresmenëve dhe senatorëve amerikanë, të cilët e kanë mbështetur Kosovën tash e sa dekada.

“Kjo marrëveshje prej 49 milionë dollarëve amerikan do të fokusohet në dy fusha: Sundimi i Ligjit dhe Efiçenca në Energji, përmes projekteve dhe aktiviteteve të ndryshme që do të implementohen përgjatë 4 viteve. Është kjo ceremonia e parë në historinë e MCC-së, që nënshkruan një marrëveshje të tillë në Kongres”, thuhet në njoftimin e Presidencës kosovare.

Ndryshe, Kosova është parakualifikuar për programe të MCC-së, në nëntor të vitit 2015, me qëllim identifikimin  e fushave të mundshme të investimeve transformative për rritje ekonomike, zvogëlim të varfërisë si dhe për krijimin e  vendeve të reja të punës në Kosovë.