Themelohet Instituti Zviceran për të Drejtat e Njeriut

Ai në të ardhmen do t`i japë rekomandime autoriteteve, shoqërisë civile ose edhe ndërmarrjeve si dhe të shërbejë si platformë për këmbimin e temave mbi të drejtat e njeriut

Këshilli Federal ka vendosur në mbledhjen e mbajtur sot që të themelojë një institucion të ri në nivel nacional për të drejtat e njeriut,

Qendra Profesionale Zvicerane për të Drejtat e Njeriut (SKMR) ka funksionuar dhe ka ofruar shërbimet e veta në fushën e të drejtave të njeriut që nga viti 2011. Federata porosit te SKMR-ja ekspertiza, studime ose manifestime sensibilizuese, për çfarë ka paguar rreth një milion franga në vit., thuhet në një komunikatë të qeverisë.

Ndërkaq, një evaluim i realizuar së fundi ka ardhur në konstatimin se ekzistlon nevoja për shërbimet e tilla. Nisur nga kjo, Këshilli Federal ka vendosur që të zhvillojë më tutje qendrën profesionale në një institucion të nivelit nacional. Ai, ashtu sikurse edhe deri tash, duhet të jetë me bazë universitare.

Është parashikuar një financim bazë nga federata prej 1 milion frangash në vit, transmeton albinfo.ch. Ky financim do të munësonte që institucioni të aktivizohej dhe të trajtonte ato tema që i konsideron relevante për përmbushjen e mandatit të tij.

Ai në të ardhmen do t`i japë rekomandime autoriteteve, shoqërisë civile ose edhe ndërmarrjeve si dhe të shërbejë si platformë për këmbimin e temave mbi të drejtat e njeriut. Por, instituti në fjalë mund edhe të marrë porosi.

Këshilli Federal ka angazhuar Departamentin e Punëve të Jashtme (EDA) dhe atë të Drejtësisë dhe Policisë (EJPD) që deri në fund të qershorit 2017 të përpunojë një draft konsultimi.

SKMR qe themeluar në maj të vitit 2011 nga ministrja e atëhershme e punëve të jashtme, Michelibe Calmy-Rey. Ai ka qenë deri në fund të vitit 2015 i drejtuar nga eksperti i marrëdhënieve ndërkombëtare Walter Kälin nga Berna. Kälin konsiderohet baba shpirtëror i Këshillit të të Drejtave të Njeriut brenda OKB-së.