Tre të arrestuar për krime lufte

Sipas njoftimit të Policisë të arrestuar janë vëllezërit Rrustem dhe Hetem Geci si kushëriri i tyre, Sabit Gecit

Tre persona nga rajoni i Skenderajt, ish-gueril të UÇK-së, janë arrestuar nga policia e EULEX-it nën dyshimin për krime të luftës. Ata janë arrestuar të enjten në Llaushë dhe në Prishtinë, ndërsa të premten pasdite pritet që t’i jepet masa e paraburgimit prej 30 ditësh nga gjykatësi paraprak. 

Sipas njoftimit të Policisë të arrestuar janë vëllezërit Rrustem dhe Hetem Geci si kushëriri i tyre Sabit Gecit. Sipas njoftimit nga Skenderaj, hetuesit e EULEX-it të mbështetur edhe nga njësitet speciale të Policisë së Kosovës, kanë bastisur shtëpitë e tyre. 

Tre të arrestuarit kanë qenë ish luftëtarë të Ushtrisë Çlirimtare të Kosovës, ndërsa dy vëllezërit, Hetem e Rrustem Geci kanë qenë pjesëtar të Forcës së Sigurisë së Kosovës. Ndërsa Sabit Geci, ka qenë ish pjesëtar i Trupave të Mbrojtës së Kosovës, pas shpërbërjes së kësaj trupe ka punuar në PTK.    

Ky arrestim për krime lufte, ka ngjallë reagime të shoqatave luftës. “Ne kërkojmë nga EULEX-i që t’i lirojë tre të arrestuarit, sepse edhe deri më tash është dëshmuar pafajësia e të gjithë atyre që u morën dhe u arrestuan. Ata janë të pafajshëm krejtësisht”, thuhet në një reagim të shoqatave të luftës së UÇK-së.